(¯`•._.•[ (مــصـافـحـة أولـى ) ]•._.•¯)

إلى كل أعضاء وزوار هذا المنتدى الرائع
السلام عليكم ورحمة الله وبركاته . . .
أحببت أن أشارك في هذا المنتدى الذي يضم بين أركانه (كوكبة من المبدعين ) وأتمنى أن مصافحتي هذه تنال أعجاب جميع من يقرئها .
مشاركتي هذه قصيدة للشاعرة (نوف بنت شطيّط العتيبي) تصف فيها حال بعض الرجال في هذا الزمان.
وأيضاً رد على القصيدة من الشاعر (حمدان مسعود العتيبي) .
أليكم قصيدة الشاعرة نوف العتيبي والرد عليها

إذا المراجل لبسة شماغ وعقال=قل للعذارى يلبسنّ العمايم
ما عاد يفرق زول حرمه ورجال=دام الفعايل تشبه البعض دايم
المرجله ما هيب كلمه وتنقال=وتروح ما راحت هبوب النسايم
وإلا خشونة صوت أو رفع الأثقال=أو رزة صدور وفعل الزلايم
ولا هي بعد مفتاح موتر وجوال=وإلا ردى لسانن حديثه شتايم
المرجله شيمه عن القيل والقال=رفيع نفس(ن ) حر بالجو حايم
المرجله عقلٍ وزن وزنه جبال=ودون العقل وش فرقنا والبهايم
يا مسندي لو مايل الوقت بي مال=يا ولد أبويه يا عظيم العزايم
يا معرب الجدين من العم والخال=يا نخوة المفزوع وقت الهزايم
المرجله يا خوي هي طولة البال=هي العزم هي الصبر فالظلايم
فيها الكرم عزه ودله وفنجال=فيها الكرامه عن ردى الطبع شايم
والدين لامنه خذا القلب منزال=مشى طريق الحق وإبليس نايم
ومن لا عرف ربه في طيب الحال=لابد وقت الضيق بالهم هايم
حتى صلاتك مع جماعات ورجال=في خيرها يا خوي نعم الغنايم
ولامن نصف ليلك قم صفي البال=يا عظم أجرك بين ساجد وقايم
ولا من رفع ربي له كل الأعمال=حسن الذكر لا قالو فلان صايم
وخلك شريف القصد يا طيب الفال=سوء المقاصد فالبيوت الهدايم
واحذر تبيع النفس في درب الأنذال=وتتبع خوي إبليس راع النمايم
النفس خيلً لك إذا كنت خيّال=ومن لا قوى نفسه قوته الهزايم
ولا صرت ما تدري لو يش أنت رجال=والله خسارة فيك ذبح التمايم
نوف العتيبيه تغنت بالامثال=جزل البيوت المرهفات الحشايم
أبيات صاغتها كما عقد سلسال=لعيون وافين الخصال العظايم
اغلى من الياقوت واغلى من المال=ويصعب ثمنها بين بايع وسايم
ليت العذاري لو على رؤوسهن شال=مثلك يا"نوف" يحرمن الهلايم
سود الوجيه مخيبة كل الآمال=اللي مكانتها مكانة قمايم
انذال ما تسوى لها قرش وريال=من فعلها ما شافت الا الندايم
الكل منهم خاب لو قال ما قال=ولاهوب محسوب على اهل القدايم
خايب رجاء لو يلبس بشوت الابطال=واخيّر يلبس له عباه ولثايم
ما هو كفو يامر على بيت وعيال=الله يشيله مع جميع الخمايم
واللي مثل عزوتك للحمل شيال=عريب جد ولا تجيه الضوايم
يذكر بفعل الطيب في كل الافعال=ومع النشامى نال خير القسايم
يرعى حقوق الله ولاهوب محتال=ابيض وجه ما يلحقه لوم لايم
المرجله يبدي على رجمها العال=حراً شهر عن بومها والحمايم
وحاش المراجل كلها دق واجلال=وفي بحرها سابح وغاطس وعايم
في مجلسه يجمع له رجال ودلال=والعود الازرق وامهات القوايم
عزاً لربعه دايم الدوم لازال=حظه مع اهل الطيب والجود قايم
والمرجله لو هي صعيبه لها طال=يا جعل عمره ما تجيه الثلايم
هذاك تضرب فيه يابنت الامثال=راع الوفا والمرجله والولايم
والله يديم اهل الوفا سنين وليال=اللي تشيّم لبسها للعمايم
ويابنت دايم وَابل الخير همال=تبقى الرجال ولاتموت العزايم
تم الكلام وكلمة الحق تنقال=حنا الرجال مطوعة كل هايم
وفالشجره الخضراء لنا فّي وظلال=وبالعقل نفّرق عن جميع البهايم